Kaaf iyo kala dheeri!
Waagu
marka uu iftiimo ayay ka baxdaa gurigooda una jarmaaddaa goob shaqo oo ay ka
shaqayso. Shaqadeedu waa joogto waliba waxa u dheer siminaarro ay wiiggiiba
laba jeer ka qayb gasho. Galinka danbe waxa ay waxbarasho u aaddaa
jaamacadda iyadoo ku jirta sannadkii u danbeeyay.
Hammigeeda
iyo himiladeeda waxbarasho waxa ay gaadhsiisan tahay meel fog. Waxa ay
hiigsanaysaa meel dheer, in badan bay waxbarashadan wadiddeeda ku samirtey,
saaxiibaddo badan oo dheega ay isku hayn jireen way ku cidleeyeen socodkan iyo
hayaankan dheer. Waxbarashada marka ay dhammayso shaqo tan ka wanaagsan oo ka mushahar badan ayaa maankeeda ku jira “Galin hore iyo ku danbeba waad shaqayn, oo
doollarkaa ku daba carari”, ayaa maskaxdeeda ku qufulan.
Tacab
iyo dadaal in ay nolosha sareedadeedu ku timaaddo, horumarka iyo hore u
socodkana in ay gacanteeda ku keensan karto ayay aamminsantahay. Dhayal iyo
guri iska fadhi bari hore ayay dhinac iskaga tuurtay inannimo iyo hawlihii
guriga hadday noqoto wax karin, wax dhaqid, iyo
wax nadiifin toona xaafaddoodu kuma hallayso. Oo miyay garanaysaa baa ka
horraysa?! Waligeed fijaan sii jeeda may soo jeedin koob shaah ahna dabka may
saarin, miyay haleelaysaaba?! sowtan ku mashquulsan akhriska iyo muraajacada
duruusta iyo hawl maalmeedkeeda la xidhiidha shaqadeeda.
Da’dii
habluhu ku guursan jireen way gaadhay, balse ma hadal hayso. Hooyadeed dhawr
jeer ayay kula talisay in ay nolol reernimo iska samaysato balse waxba kamay
hoos qaadin oo guur, xaas iyo carruur midnaba niyadda kuma hayso qorshaheeda
mustaqbaleedna uguma jiraan.
Saddex
sanno ayaa laga joogaa waagii ay jaamacadda dhammaysay. Rajadeedii iyo
riyooyinkeediina Ilaahay baa u rumeeyay. Galin hore iyo ku danbeba waa ay
shaqaysaa oo waxaabay noqotay masuulka ugu sareeya goobta ay ka shaqayso.
Nolosha ay ku jirtaana waa tii ay waligeedba u heellanayd kuna riyoon jirtay
baabuurta ayay kala badashaa malaha doollarkuna waa buu dabo cararaa!
Maanta
ayay haddaba riyadii hooyadeedna rumaynaysaa. Waa maalintii meherkeeda waxa
laga yaabaa in aad is waydiiso oo sowtii guurka necbayd maaha?! wali way
necebtahay se hooyadeed ayaa ku qasabtay oo wax ay la daba socoto oo ku adkayso
guurso maanta ayay ku qancisay in ay xaas noqoto oo hoy iyo guri yagleesho.
Hooyadeed iyo aabbaheed baana qorshahaas oo ay muddo wadeen dhammeeyay.
Wiil
ay ilmaadeer yihiin oo adeerkeed dhalay baa la go’aamiyey in laysku daro.
Wiilku waxa uu ka yimid Kanada, halkaas oo uu jaamacad ku soo dhammeeyay kana
shaqayn jiray balse ugu danbayntii go’aansaday in uu waddanka u soo guuro
reerna ku yeesho. Inta uu guri ka dhisto magaalada ka dibna gabadh
guursado ayuu qorshihiisu ahaa se gabadh noocee ah baa tolow ku jirtay
maankiisa “Gabadh dabeecad wanaagsan,
diin leh, oo gurigeeda aan ka bixin, ciyaalka si fiican korintooda ugu heellan
oo waqti badan siisa, isagana daryeelka ugu roonaata!” Markii se lagu yidhi
inaadeertaa baa lagu siinayaa hadalba ka muu soo celin, oo miyuu ka soo celin
karayaaba sow ceeb kumay noqoteen canaana looma raaciyeen.
Balse
waxay su’aashu tahay ma tahay gabadhii uu maanka ku hayay?. Ma ogyahay in
inta uu xaafadda ka maqnaan doono in la mid ah ay iyadna ka maqnaan doonto
shaqo awgeed? Ma ogyahay in ay tahay masuul sare oo aan daqiiqad soo wacidda
telefoonkeedu joogsanayn? Ma ogyahay in ayna shaqada guriga ka dhago la’dahay
oo aan ay cunto haba yaraata ee u samayn karayn? Ma ogyahay in ayada laftigeeda
guurkan gabigiisaba lagu qasbay oo aanay diyaarba u ahayn? Ma ogyahay in ay
himiladeedu tahay uun shaqayso oo qayrkaa dhaaf? Mase ogyahay se in aanay waxba
ka garanayn xuquuqda dadka is qabaa isku leeyihiin iyo waajibaadka gabadha
saaran toona?!
Oo
maxaa ogaysiiyay waxan oo dhan miyuu ka filayaaba sidan oo kale gabadh
waddankii ku dhalatay kuna barbaartay halkaasba waxa uu uga soo cararay sow tan
oo kale may ahayn. Adigu wax kale kuma garatide waaba kaaf iyo kala-dheeri! Laakiin wakhtigaa ku simi oo danba way isku
baran.
Bilowgii
noloshooda qoysnimo iyo bilihii hore cuseybka awgii midna ka kale ma tusin
dabeecaddiisa dhabta ah iyo rabitaankiisa habka qoysku u dhaqmayo.
Ixtiraam
iyo dulqaad buuraha ka culus baa mid ba ka kale u hayey oo haye iyo hawraarsan
uun baa laysugu hal celinayey. Isagu shaqada inay iska sii wadato inta aan
carruuri soo kordhin intii ay aqalka ku dhex cidloon lahayd buu u oggolaadey.
Iyana maalinta ay fasaxa tahay madbakha wey gashaa oo inanta u shaqeynaysa
ayuun bay u wehel yeeshaa indhahana ka daawataa farsamada cunto karinta ilayn
iyadu karin kari maysee, isna waabu ku farxaa markay galin horeba soo hordhigto
iyadoo diyaarsan!
Sannad
ayaa ka soo wareegtey habeenkii loo mushxaradey ee nin iyo xaaskii ay isku
noqdeen. Imikana guriga kali kuma aha ee inankooda curad baa ku weheliya oo ku
soo biirey laba biloodna jira. Haatan midiba ka kale wuxuu tusey dabeecaddiisa
dhabta ah oo kala duwaanaanshihii awalba la huurinayey ayaa ifka u soo baxay.
Sidii isagu rajaynayey marka ay hooyo noqoto shaqada way iska joojin ayaa u
rumoobi weyday oo bishan ba shaqadeedii wey ku kallahdaa, ilmahana guriga iyo
gabadha u shaqeysa ayey kaga tagtaa.
Aqoon
la’aantii shaqada guriga ka haysayna wuxuu ogaadey mar inantii u shaqeynaysay
todobaad kaga maqnayd xaafaddoodii oo ay si cad ugu sheegtay in hawsha madbakha
in isagu ku dhaamo ay dhici karto! Cajiib! Todobaadkii inantu reerka ka maqnayd
miyaan raashinka gabigiisana hudheel u dhawaaa lala macmiil noqon. Wuu u
sheegay in sida ay wax u wado iyo sidii uu ka rajaynayey shaqo isku lahayn,
laakiin cidba dhag jalaq uma ay siin waliba waxa ay u sheegtay in guurkaba
Adeerkii iyo Aayadii (Hooyadeed iyo Aabaheed) ku qasbeen ee aanu go’aan iyada
ka yimi ahayn.
Arrintan
soo korodhay wuxuu tiraba dhawr jeer u sheegay aabbihii iyo hooyadii, laakiin
aabbihii oo xeerinaya walaalkiisa ay xididka noqdeen baa dulqaad faray, se
hooyadii arrintani ma ay cajab galin wayna ka murugootay hab dhaqanka inanta ay
aayada u ahaan jirtey ee ay imikana soddohda u tahay. Intaas uun maahee waxay
ciil iyo cadho u qabtaa dumaashigeed iyo gabadhiisa oo ay qabto in ay u
qariyeen hab dhaqankan foosha xun ee inantooda.
Inkasta oo aanay shaacin waxay haddana jeclaan lahayd in lakala dhaqaaqo
ba.
Dudmo
joogto noqotey iyo ergo dad badani galleen oo lixdan bilood ee ugu dambeeyey
soo taxnayd ayey ugu dambayntii go’aansadeen in ay kala tagaan oo aqalkan sii
waaridiisa ay isla fahmi waayeen albaabada u laabaan. Waa go’aan oo talo iyo
wax weydiin midna laguma marti qaadin reerihii ay ka soo kala jeedeen ee
ogaysiin uun baa loola tagay.
Maanta
ayaa maxkamadda degmada horteeda oo ay goob joog ahaayeen ehelo iyo asxaabi
waxa ay ka hor qirteen in ay isfureen oo bannaanka la kala maro. Wiilkii iyadaa
oggolaatey in ay korsanayso, isaguna inkasta oo uu aad ugu doodey in uu isagu
koriyo wiilka oo iyada aanu ku ogeyn dhaqan hooyonimo oo ilmaha si fiican u
daryeeli kara haddana cidi kama dhurin hadalkoo mudnaanta hooyanimo awgeed waxa
garsoorihii dacwada qaadayey shaaciyey in ilmaha hooyadii haysanayso isagana
wuxuu ku amrey in aanuu kala habsaamin bil kasta lacagta daryeelka ilmihiisa,
waana laga saxeexay iyadoo waliba la cayimay xaddiga lacag ah ee bil kasta laga
rabo.
Kaaf
iyo kala dheeridii guriga lagu dhisey kala tag uun muu keenine waxa colloobay
qoysaskii ilmaadeerta ahaa ee labada walaalaha ahi odeyadda u ahaayeen oo
booqasho daayoo dhibaatadda layskama gargaaro. Wiilkii isaga hooyadii iyo
aabbihii kala tageen waxa dhabarka u ridatey ayeeydii hooyo oo daryeel ka
balaadhan kuu heli jirey intaan gurigoodu dumin buu helaa.
Hooyadii
waxay wali halgan ugu jirtaa ka dhabaynta hammigeedii in ay meel sarre ka
gaadho shaqada ahaa, aabbihiina qurbihii iyo noloshii uu guurdoonka uga soo
hayaamay buu ciilkii dib ugu noqdayoo barafkii buu isaga dhex raftaa.
Comments
Post a Comment