Lama Filaan!
‘Hargeysa, 2001’
Qaylo,
buuq iyo oohin ayaa si is daba joog ah ugu soo dhacayay dhageheeda markii ay ku
soo socotay xaafadda saxiibadeed Caasha, iyadoo codka qaylada iyo buuqu marba
marka ka danbaysa uu kordhayay.
Naxdin
buu Ilaahay isugu keenay Hodan kadib markii ay soo gaadhay gurigii ay degganayd
saaxiibadeed Caasha oo ay isku xaafad ahaayeen balse ay waxoogaa kala
durugsanaaayeen. Hodan oo aad u yaaban su’aalo fara badanna is waydiinaysa ayaa
soo gaadhay irrida laga galo aqalka. Daarada guriga waxa buux dhaafiyay dad
dumar u badan, iniba meel bay taagan tahay, qaar hawlo ayay ku mashquulsan yihiin,
waxa kaliya oo ay ka siman yihiin dhammaan wajiyadooda murugo badan ayaa ka
muuqata.
Isla
markii ay guriga ay soo gashay Hodan waxay isha ku dhufatay koox haween ah oo
ku uruursan ruux dumar ah oo aad u barooranaysa una qaylinaysa. Yaab! Dhinaca ay eegtaba waa qof ooyaya. Qof ay wax
waydiiso ayay garan wayday dadka oo dhan si bay u yaaban yihiin haddana u
mashquulsan yihiin waxaad mooddaaba in aanay waqti u hayn qof
inay u jawaabaan.
In
muddo ah ayay sidii qof waalan dadka dhex wareegaysay oo yaabanayd, qof ay la
hadashana garan la’ayd. Markii ay ku dawakhday dadkii badnaa ee is dhaaf
dhaafayay ayay markii danbe is dul taagtay ruuxii dumar ahaa ee lagu uruursanaa
ee ay ugu horrayntii markay guriga soo gashay isha ku dhufatay. Haweenka dul
taagnaa oo badnaa dartood waxa ay awood u wayday in ay aragto qofkan sida
murugada badan u ooyaysa. Wax ay dadkii cidhiidhsataba waxa ay aragtay Caasha
hooyadeed Xaliimo oo ay ilmo qoysay maryaheedii. Hodan afka ayay kala qaaday
waxay tidhaa ayay garan wayday waxa ay u fiirsatay hadalada ka soo yeedhaya
hooyo xaliimo.
“Alla jabayeey!...way hooyo Caashaay!... way
gabalkay dunyeey!”
Anfariir
baa Hodan qabsaday, waxay qaadday shoog. Waxa ku adkaatay neeftii, meel ay
joogto ayay garan wayday. Iyada oo isla maqan ayay islaan agteeda taagnayd
waydiisay.
“Hooyo! Caasha maxaa ...Caasha maxaa ku
dhacay?!”
Hadalkii
baa ku dhagay
“MeedayCaashi?... Maxaa helay?!”
Ayay
ku celcelisay iyadoo aan is ogayn. Islaanta oo si fiican u taqaanay Caasha iyo Hodan sida ay saaxiibka u ahaayeen
ayaa ku dheygagtay wajiga Hodan iyo ilmada indhaheeda ka qubanaysa. Kadibna dib
u xasuusatay sida ay u ahaayeen saaxiibbo is jecel, isku naxariista, isku
kalsoon, midba midka kale la farxo waqtiga farxada lana murugoodo waqtiyada
adag.
Wali
Hodan waxay ku qaylinaysaa islaanti, islaantiina wax jawaab ah uma celin.
Caasha habaryarteed ayaa ka war heshay islaanta iyo inanta isla jahawareersan
kadib intay xaggooda u soo dhaqaaqday oo Hodan gacanta qabatay u kaxaysay qol
cidlo ah kadibna si deggan ugu bilowday
hadalkii:
“Hooyo Hodaneey wax walba Ilaahay ayaa qoray
oo innagu wax aynu ka qabankaraynaa ma
jirto!”, si naxariis leh ayay kalmadahaa caqli celinta ah u dhugatay Hodan.
“Qof walba oo dunida guudkeeda joogaa wuu
dhimanayaa goor ay noqotaba!” ayay raacisay kadibna hadalkii inta ay yar
kala goysay ayay illin fara badani indhaheeda soo buuxisay. Kalmadahan ku
dhawaaqistooda aad ayay ugu adag yihiin Caasha habaryarteed gaar ahaan u
sheegista Hodan oo ahayd saaxiibadda kaliya ee Caasha.
Caasha habaryarteed intay calool adeyg muujisay bay
tiri “Caashana hooyo wadkeedii baa galay
oo way geeriyootay!!”
Intaas
markii ay Hodan dhageheeda ku soo dhacday baa miyir iyo maan ugu danbaysay!
“Alla bisinka inanta maxaahelay biyo u
keena!...”
Caasha
Maxamed waxay ku dhalatay oo ku barbaartay magaalada Hargaysa, waxay la
dhalatay toddoba carruuur ah oo ay u waynayd. Aabbaheed wuxu ku geeriyooday
shil baabuur markay da’adeedu ahayd toban sano. Caasha waxay ka dhalatay qoys
aad u danyar nolol maalmeedkooduna aad uu cidhiidhi u yahay.
Hooyadeed
Xaliimo waxay ka mid ahayd dumarka suuqa ku gada qudaarta taas ayaana u ahayd
isha dhaqaale ee kaliya ee qoyska reer Maxamed quutaan iyadoo ku kabi jirtay
nolol maalmeedka iyo waliba kharashka dugsiyada ubadku ay dhigtaan.
Caasha
waxa ay ku kortay noloshaa qalafsan ee aadka u dhibka iyo masuuliyadda badanba
leh. Waxa ay isku wadday waxbarasho iyo inay ka war hayso kana shaqayso guriga
muddada ay hooyadeed suuqa ku maqantahay maadaama ay ahayd curadda reerka.
Noloshaa
adag ee ay Caashi ku noolayd waxay ku dhalisay inay marwalba ka fekerto
mustaqbalkeeda iyo kan qoyskooda. Taasi waxay keentay inay caashi dedaal badan
kadib hormood u noqoto fasalkeeda iyada oo mutaysatay inay Caashi noqoto
ardayad lagu soo hirto xaga waxbarashada iyo xaga akhlaaqdaba.
Ardayda
fasalkeeda iyo macalamiintunba aad bay u jeclaadeen Caasha maadaama ay ahayd
ardayad ku sifowday akhlaaq wanaag iyo dedaal.
Sidaas
ayay caashi ku dhamaysatay waxbarashadii dugsiga hoose dhexe ka dib markii ay natiijo
aad u wacan kaga gudubtay imtixaankii shahaadiga ahaa ee fasalada siddeedaad.
Kadib
markii ay dhamaystirtay waxbarashadii dugsiga hoose dhexe, Caasha waxay ka mid
noqotay ardaydii lagu soo qoray dugsiga sare ee Faarax Oomaar. Caashi marnaba
kamay gaabin dedaalkii badnaa ee looga bartay. Waxay sii libinlaabtay
dedaalkeedii sidaas ayeey ahayd illaa ay soo gaadhay marxaladdii ugu danbaysay
ee dugsiga sare.
Caashi
waxay u fadhiisatay imtixaankii shahaadiga ahaa ee dugsiyada sare wuxuna ugu
dhammaaday jawi wanaagsan oo farxad leh.
Fasax
kooban ka bacdi waxa la gaadhay xilligii lagu dhawaaqi lahaa natiijadii
imtixaanaadkii waxana dhammaan Telefishanada iyo Raadiyayaasha dalka laga
shaaciyay in berri subax arday walba diyaar ku ahaado dugsigiisii si uu helo
derajadiisi.
Cadceeddu
markay godkeeda ka soo baxday falaadhaheedana gaadhsiisay oogada dhulka, Caasha
oo goorahanba ku hawlanayd samaynta quraacda ayaa markii ay dhamaysay toosisay
Farxiya oo ahayd inanta dhalasho ahaan ku xigta, kuna ballamisay inay quraacda
usii qaybiso ciyaalka maadaama ay maanta hore u baxayso.
Shalmad
halkan taalay intay garbaha saaratay ayay abaartay gurigii saxiibaddeed Hodan.
Hodan
oo irrida ku hor sugaysay ayay salaan ka bacdi waddada tagta dugsiga cagta
saareen. Caasha iyo hodanba aad ayay u naxsanaayeen, waxay socdaan oo ay waddadu la dheeraataba
waxay soo gaadheen irrida wayn ee laga galo dugsigooda.
Arday
aad u tiro badan oo wiilal u badan ayaa ku xoonsan goobta ay natiijadu ku
dhagsantahay dhammaan hablaha kale ee fasalka oo ay Caasha iyo Hodan ka mid
yihiiin waxay jaanis u waayeen in ay natiijo daaye xaashida caddaankeeda baal
saaraan.
Waxay
geed yar oo halkan hoos taagnaadaanba, waxa yaraaday buuqii waxaana goobtii ku
soo hadhay dhawr qof. Mar kaliya ayaa loo wada baratamay halki ay natiijadu ku
dhagsanayd. Caasha waxay markiiba nasiib u yeelatay in ay ka mid noqoto
ardaydii sida tooska ah u hor istaagay warqadda. Waxayna isla markiiba bilowday
inay magaceeda ka dhex raadiso dhawr waraaqood oo si qaab daran meesha ugu dhagsanaa.
Waxay
ardaydii eeg eegaanba Hodan ayaa si kedis ah isha ugu dhufatay magaca
saaxiibadeed Caasha Maxamed Geeddi, waqtiba iskamay lumin ee waxay markiiba
isha la raacday natiijooyinkii maaddooyinka illaa ay gaadhay natiijadii guud ee
isku gaynta.
Naxdin
iyo af kala qaad baa Hodan qabsaday “Malaha
dhab maaha!” Haddana eegmada ayay ku celisay mar labaad warqaddii. Gow! wax
iska baddalay ma jiraan. Hodan waxa ay fiirisay Caasha oo barbarkeeda taagan oo
wali iyadu ku mashquulsan baadhitaanka natiijadeeda.
Hodan
talo ayaa ku cadaatay wax alaale wax ay samayso ayay garan wayday waxay
hilmaantay inay eegato natiijadeedii. Iyadoo Hodan wali sidii u taagan farna
aan dhaqajin ayey Caashi mar kaliya isha ku dhufatay magaceedii kadibna si
xiiso leh u eegtay natiijadeedii.
Gag!
“Macquul maaha!... ma dhici karto!...
tani maaha natiijadaydii!”, ayay Caashi kor ugu dhawaaqday iyada oo aan Is
kala ogayn miyirkeeduna maqan yahay Inta ay indhaha marmartay ayay mar kale dib
u eegtay warqaddii. Haba sheegin! Caasha waxa sida xabbad ololaysa oo wadnaha
ka gashay oo kale ku noqotay natiijada loo soo dhajiyay oo ahayd tan ugu
hoosaysa (F).
Hodan
oo wali naxsan ayaa Caasha oo isla hadlaysa naxdin darteedna jidhka oo dhami
gariirayo, intay gacanta qabatay ka dhex kaxaysay buuqii. Waxay sii luudaanba
waxay soo gaadheen guriga Caasha. Caasha hooyadeed oo isla markaas uun ka timid
suuqa oo qado u saaraysay dabka ciyaalka kahor inta aanay dugsiga ka imaan ayaa
ku warheshay inanteedii Caasha oo garbaha la ahayo ilmo badana indhaheeda ka qubanayso.
Hooyo
Xaliimo intay naxday oo ay ka dul booday dharigii ay karinaysay “Alla bisinka maxaa dhacay hooyo?!”, ayay
Hodan oo foorarsan ku tidhi.
Balse
labadooda mid toona umay jawaabin kadib markay fadhiisteen biyana loo keenay
ayay Hodan hadalkii bilowday oo tidhi:
“Hooyo sidaad ka warqabto saaka waxay ahayd
maalintii lagu dhawaaqayay natiijooyinkii rasmiga ahaa ee imtixaankeena”
“Haye”
“Kadib markaanu tagnay saaka dugsiga ee lasoo
dhajiyay natiijadii waxaanu ogaanay wax run ahaantii naga yaabiyay aniga iyo
Caashaba….waxa la soo dhajiyay inay Caashi wayday imtixaankii!!!”
Naxdin
iyo amankaag! Caashaba waxa ka dartay hooyadeeed oo markii ay intaas dhagaheeda
kuu so dhaceen qaylo miciinsatay illaa ay jaarkii oo dhammi isku soo baxeen.
Maalintaas
Caasha waxay u ahayd maalin aad u xanuun badan oo lama filaan ah. Waxay ka
go’day cuntadii oo waxba jidiinkeeda way ka dagi waayeen.
Gabalku
markuu dam yidhi cadceedduna hogeeda gashay qof walba oo xaafadda ka mid ahina
u huleellay furaashkisii iskuna diyaariyay hurdo, Caasha inta ay dul
fadhiisatay furaashkeedii ayay fikir hor leh bilowday iyada oo ka fikiraysa
waayaha aduunyada iyo halka uu ku danbayn doono mustaqbalkeedu maadaama uu
dhaawac wayni soo gaadhay habsami u socodkii nolosheeda.
Caashi
waxay habeenkii oo dhan ka fikiraysay nolosha ay ku soo kortay illaa haddana ay
ku nooshahay waxay dib u xasuusatay siday ugu wanaagsanayd waxbarashada, sida
ay ugu fikiri jirtay inay noqoto qof ka midha dhaliya himmiladiisa, iyo xusuuso
kale oo midba midka kale ka xanuun badan yahay ayaa si is daba joog aha
maskaxdeeda ugu soo dhacayay una diiday jiif iyo joog.
Waxa
ku sii batay murugadii illintii indhaheeda ka qubanaysay waxay qoysay dharkeeda
oo idil.
Markuu
sheekhu addimay subax hooyadeed oo u kacday salaadda ayaa aragtay qofka
furaashka dul yuuruura misana ooyaysa intay si naxariis leh u egtay ayay meel
agteeda ah labo ragcadood ku tukatay kadibna u ducaysay.
Qof
iyo geed markii la kala gartay qorraxdiina
soo baxday qof walba oo qoyska ahi waxa uu ka baxay albaabka. Nolol
maalmeedkooda ayaa sidaa ah, dhammaan ciyaalku dugsiga ayay aadaan hooyadeedna
suuqa. Caasha hooyadeed oo ka werwersan xaaladda inanteedu ku sugan tahay ayaa ugu danbeysay oo kadinka ka baxday.
Caasha
iyadu xaalkeedu ma wanaagsana halkay shalay duhurkii ku kala dhacday ayay wali
jiiftaa inta ay soo sare kacday ayey u soo dhaqaaqday xagii daaradda iyada oo
aan garanayn meel ay ku socoto. Sidii ay u soo socotay ayay soo gashay buul yar
oo xaafaddoodu madbakh ahaan u isticmaali jireen kadib markii ay soo gashay
waxay isla markiiba isha ku dhufatay faynuus meel horteeda ku beegan yaalay
inta ay ku booday faynuuskii ayay wixii gaas ku hadhsanaa isku foorararisay
kabriidna isu raacisay BUL!
Iyadoo
oo ololaysa ayay buulkii qaylo kaga so baxday. Islaan usoo wareegtay reerka
ayaa aragtay inanta ololaysa inta ay naxday ayey u oroday xagii foostada biyuhu
taalay, jeeg intay buuxisay ayay Caasha oo qaylinaysa dusha kaga keentay.
Kadibna Caasha waxa ay ku hor dhacday guriga hortiisa waa ay tamar beeshay
qaarka sarena xoog ayay uga gubatay gaasta oo u badnayd awgeed.
Mudo
shan daqiiqo ah caasha wax dhaqdhaqaaq ah waa laga waayay dabka oo xaga sare u
badnaa iyo biyihii oo diirka si xun uga saaray ayaa sababay inay Caashi awoodi
waydo inay sii noolaato. Sidaas ayay Caasha Maxamed ku geeriyootay waxayna
ahayd geeri aad u naxdin badan oo murugo ku reebtay qalbiyo badan.
Comments
Post a Comment