Danbi Kama Dhaco Buuraha!
Qisadan ‘No Crime in the Mountains’ waxa
qoray qoraa Maraykan ah oo lagu magacaabo Raymond Chandler. Raymond waxa uu
caan ku ahaa qorista sheekooyinka ku saabsan dambiyada ‘Detective stories’.
Buugtiisa kuwa ugu caansan waxaa ka mid ah: The Big Sleep, Farewell My Lovely,
The Long Goodbye iyo No Crime In th Mountains. Qaar ka mid ah sheekooyinkiisa
waxa laga sameeyay filimada ugu caansan Hollywood.
Duhurkii ka hor ayay ii soo dhacday
warqaddu. Warqad aanan sugayn ayay ahayd waxaana dusha kaga qornaa cinwaanka
qofka soo diray iyo magaalada uu joogo (F.S Lacey, Puma Point, California).
Gudaha galka ay warqaddu ku jirtay waxa la socday jeeg uu ninka warqadda soo
diray ku saxeexan yahay. Waxaana ku qornaa lacag boqol doolar ah. Warqaddii ayaan kala furay, waxa
ku qornaa sidan:
‘’Mr John Evans
Mudane
Magacaaga waxaa I siiyay Len Esterwald. Ganacsigaygu waxa uu si
degdeg ah ugu baahan yahay qof adiga oo kale ah. Haddii aad ogoshahay fadlan
degdeg u kaalay Puma galabnimada ama fiidnimada Khamiista. Huteelka Hindida
iska diiwaan gali igana soo wac lambarkan 2306’’
Muddo wiig ah maan haysan shaqo sidaas
darteed aad baan ugu farxay codsigan. Baanka ku qornaa warqadda ee lacagta aan
ka qaadanayay lix sekedood baa iga xigay. Waan tagay lacagtiina waan soo
qaatay, waan qadeeyay baabuurkii ayaan soo kaxaystay waxaanan u dhaqaajiyay
halkii warqadda ku qornayd.
Dhulka u dhaxeeya labada meelood ee aan u
kala socday aad ayuu u kululaa. Gabal dhicii ayaan soo gaadhay Puma aniga oo
aad u gaajaysan. Waxa aan toos u tagay huteelkii Hindida ee warqadda ku qornaa.
Huteelku waxa uu ku yaalay dhisme cawlan oo ka soo horjeeda meel lagu ciyaaro.
Waan is diiwaangaliyay boorsadaydii qaatay kadibna tagay qolkii aan kiraystay.
Wajiga iyo gacmaha ayaan dhaqay kadib hoos ayaan u soo daadagay si aan wax u
cuno.
Dibadda ayaan u soo baxay si aan telfoon
ugu diro ninkii warqadda ii soo diray. Waxa aan soo galay meel telfoonada laga
diro waxa aanan wacay lambarkii ku qornaa warqadda ‘2306’. Gabadh ayaa iga
qabatay kadib waxa aan ku idhi
‘Ma joogaa Mudane Fred Lacey?’
‘Waa kuma fadlan?’
‘Magacaygu waa John Evans’
‘Mudane Fred Lacey hadda ma joogo, ma
ballan ayaad lahaydeen?’
‘Adigu ma gabadhii Fred Lacey ayaad
tahay?’
‘Haa, gabadhiisii ayaan ahay’
‘Shaqo ganacsi ayaa naga dhaxaysa, goorma
ayuu soo laabanayaa?’
‘Ma garanayo waqtiga uu soo laaban doono.
Illaa caawa laga yaabaa’
‘Gurigiinu halkee buu ku yaalaa?’
‘Waxa uu
ku yaalaa illaa laba mayl galbeedka magaalada. Ma magaalada dhexdeeda
ayaad iga soo wacaysaa?’
‘Saacad kadib ayaan kugu soo celin’ inta
aan idhi ayaan dhigay telfoonkii.
Gabadha codkeedu waxa uu u ekaa qof
naxsan oo kale se dad badan ayuu codkoodu sidan oo kale yahay markaas dan kama
galin.
Gabadh fadhiday koonaha qolka aan
telfoonka ka dirsanayay ayaa isoo eegtay kadib inta ay dhoollacadaysay ayay igu
tidhi ‘Ma ka heshay buuraha magaaladan?”
‘Haa’ ayaan ugu jawaabay
‘Waa meel aad u deggan’
‘Haa aad iyo aad. Ma garanaysaa ninka la
yidhaahdo Fred Lacey?’ ayaan waydiiyay
‘Fred Lacey, haa waan garanayaa. Guri wayn
oo leh muuqaal fiican ayay dhawaan ka iibsadeen wabiga dushiisa. Miyaad is
garanaysaan idinku? Ayay I waydiisay
‘Maya’ intaan ugu jawaabay ayaan ka baxay
qolkii telfoonka. Waxa aan tagay huteelkii kadibna baabuurkaygii ayaan
kaxaystay.
Waxa aan istaagay figta wadada kadib waxa
aan u dhaadhacay dhinaca webiga. Geed wayn oo ku soo dhacay dhulka ayaa
hortayda iiga muuqday. Halkii figtii ayaan iska fadhiistay. Dhulku aad buu u
deggenaa una cidlaysnaa. Koonaha wabiga dhawr doonyood oo ku xidhnaa ayaa
biyaha dul sabaynayay laakiin hortayda waxaan biyaha wabiga ahayni iimay muuqan. Waxa aan is waydiiyay ninkan Frad
Lacey cida uu yahay iyo shaqadan uu kaagaa baahan yahay nooca ay tahay iyo
sababta uu guriga u joogi waayay ama farriin iiga tagi waayay haddii uu
ganacsigiisu degdeg iigu baahan yahay?
Saacad
badhkeed markii aan fadhiyay ayaan kacay oo boodhka iska tumay kadibna u
dhaadhacay xagga wabiga. Waxa aan u dhawaaday geedkii meesha ku soo dhacay. Si
kadis ayay lug iiga muuqatay geedka dabadiisa. Kadib waan u soo dhawaaday. Nin
da’ dhexe ah ayuu ahaa ninka meesha yaalay, woxoogay bidaar ah ayuu lahaa.
Wajigiisu waxa uu u muuqday nin ladan oo aan waligii werwer arag. Indhihiisu
cirka ayay eegayeen. Dhinaca bidix ee shaadhkiisa waxa ku taalay bar wayn oo
cas ku sameeyay dhiig fara badan oo ka yimid dalool muuqda oo ku beegan
badhtanka barta cas. Waxa aan jeebkiisa ka soo saaray shandadiisii jeebka. Waxa
ku jiray laba iyo toban doolar iyo dhawr kaadh. Waxa aan doonayay in aan ogaado
magaciisa. Kadib waxa aan kala furay liisankii gaadhigiisa si aan u akhriyo
magaciisa. Magaca liisanka ku qornaa waxa uu ahaa Fred Lacey!!
Comments
Post a Comment